Afundación, comprometida co «Mes do medio ambiente»
03.06.2022. Afundación impulsará durante o mes de xuño un programa de actividades de promoción da sostibilidade, co gallo da celebración do Día Mundial do Medio Ambiente, o vindeiro 5 de xuño, o Día Mundial dos Océanos, o 8 de xuño, e o Día das Xentes do Mar, o 25 de xuño. Estas datas son parte do calendario de conmemoracións internacionais de Nacións Unidas, que ten por obxectivo concienciar á sociedade sobre a contribución aos Obxectivos de Desenvolvemento Sostible.
As imaxes relacionadas coa programación están dispoñibles na seguinte ligazón:
https://drive.google.com/drive/folders/1oqy-u_ZCc_WsAcyqdEbqPvasYMJll3KZ?usp=sharing
O programa enmárcase no compromiso de Afundación a prol dun modelo sostible que permita contribuír ao equilibrio económico, social e ambiental da súa contorna. Para iso, e co propósito de mellorar a sociedade e fomentar o desenvolvemento integral de todos os que formamos parte dela, en xuño poderase aprender e gozar con propostas científicas de calado divulgativo e xeral.
«Obradoiro con bolboretas en Naturnova». Achégase o coñecemento sobre estes insectos, os seus ciclos vitais e outras curiosidades cun obradoiro infantil con bolboretas vivas, e tamén eirugas e crisálidas que se poderán ver nos seus procesos naturais. Terá lugar mañá de 12.00 h a 13.30 h.
«Xornada de portas abertas en Naturnova», o 11 de xuño. Con entrada gratuíta, o Centro Interactivo de Educación Medioambiental convida a aprender sobre medio ambiente nas súas instalacións e, tamén, a contribuír co programa «Cultura por alimentos», doando produtos de consumo non perecedoiros en beneficio dos bancos de alimentos locais.
«Os nosos océanos», no Concello do Porriño; e «Auga, o sangue da terra», no Concello de Guitiriz, son as exposicións que ilustran as marabillas dunha contorna que precisa ser respectada.
Dentro das actividades de voluntariado e as iniciativas vinculadas ao programa europeo de apoio aos ecosistemas mariños, PLANCTON, levaranse a cabo labores de limpeza o 11 de xuño nas Illas Cíes.
O 29 de xuño en Naturnova desenvolverase «Plantando árbores con pinceis» coa creación dun mural nas instalacións do centro, realizado con pinturas fotocatalíticas, que absorben o CO2 da atmosfera.
COMPROMISO COA SOSTIBILIDADE
Afundación avanza así no compromiso co progreso económico e social e o benestar das persoas que mantivo desde as súas orixes, aínda que reformulado para adaptalo ao contexto actual.
Entre as medidas implantadas para facer fronte á emerxencia climática, o 100 % da enerxía en Afundación procede desde 2020 de fontes renovables. Así mesmo, en 2021 Afundación impulsou o Plan de conservación territorial- ON (PLANCTON) en colaboración con ABANCA Mar e a Fundación Biodiversidade e cuxo obxectivo é fomentar a conservación e a sostibilidade das actividades socioeconómicas realizadas na área de influencia das Zonas de Especial Protección para as Aves (ZEPA) mariñas de Galicia, tratando de inculcar unha conciencia sostible en todos os sectores sociais.
Toda a información da actividade de Afundación, na nosa SALA DE PRENSA.