Afundación comeza a súa programación de laboratorio de ciberseguridade para escolares
28.10.2019. Afundación, a Obra Social de ABANCA, en medio dun contexto excepcional, poñerá en marcha a partir de mañá, o seu laboratorio de ciberseguridad destinado a centros educativos de toda Galicia. Desenvolverase vía streaming potenciando o uso da interacción online, como vén sendo habitual na programación de Afundación TV. Máis de 1600 escolares, procedentes de 20 colexios da comunidade, inscribíronse xa para participar nestes encontros e tomar conciencia do que realmente significa a pegada dixital, tanto desde unha mirada no presente como pensando no futuro. Dada a alta demanda destes talleres, son escasas as prazas que quedan aínda dispoñibles. Para consultar a dispoñibilidade, están habilitados o teléfono 986 333 210 e o correo electrónico areaeducativa@afundacion.org. Todos aqueles centros que non poidan inscribirse, terán ocasión de participar na segunda edición deste programa prevista para inicios de 2021.
A través dunha dinámica práctica e divertida, dúas persoas expertas en ciberseguridade abordarán, en directo, os perigos das redes sociais. Falarase de Instagram, Twitter e Facebook, de como se xeoposicionan as publicacións e faise seguimento de todo o que fan todos os usuarios. Deste xeito, os escolares poderán entender, mediante exemplos prácticos que os propios expertos realizarán cos participantes as vantaxes e os perigos de transitar por Internet e as redes sociais. Os talleres están estruturados en función das idades dos participantes, e mostrarán como o mal uso ou o coñecemento das redes pode repercutir nas vidas dos usuarios.
Dado o elevado interese que esta cuestión suscita entre todos os integrantes da comunidade educativa, Afundación incluíu un relatorio específico sobre este tema no seu ciclo de conferencias «Eduación século XXI», para que nais, pais, docentes e alumnado poidan coñecer, de primeira man, que sucede cos datos persoais de cada persoa detrás das pantallas. O ciclo de conferencias retransmítese, en directo e en aberto para todos os públicos, previa inscrición, en Afundación TV.
Toda a información da actividade de Afundación, na nosa SALA DE PRENSA.