Afundación, ABANCA e o Concello de Silleda amosan «Berces de vida»
Afundación, a Obra Social de ABANCA, o Concello de Silleda e ABANCA inauguraron hoxe «Berces de vida. De paseo polos bosques de España», unha exposición comisariada polo premiado biólogo e divulgador Joaquín Araújo. No acto estiveron Mónica González, tenenta de alcaldesa e concelleira de Cultura de Silleda; José Luis Romero Quiroga, coordinador institucional de ABANCA en Pontevedra; David Vieitez Alonso, director da oficina de ABANCA en Silleda; e Carmen Pérez Larrán, Área Educativa de Afundación. Esta mostra está incluída en «Corrente cultural», un programa enfocado á promoción de actividades culturais máis alá das sedes de Afundación.
«Berces de vida. De paseo polos bosques de España» permanecerá aberta ata o 5 de marzo no Centro Cultural Vista Alegre de Bandeira e poderase visitar de luns a venres de 16.00 a 22.00 h.
As imaxes do acto de presentación están dispoñibles na seguinte ligazón.
A exposición, articulada por 26 fotografías cheas de luz, cor e beleza, retrata os diferentes ecosistemas boscosos de todas as comunidades autónomas de España e pretende servir de chamada de atención sobre a necesidade de conservar uns espazos imprescindibles para a vida no noso planeta. Complementadas con textos explicativos de Joaquín Araújo, estas imaxes reflicten o compromiso de todas as entidades participantes neste proxecto coa preservación do medio ambiente.
En palabras do comisario da exposición, «o bosque é o lugar onde a luz se converte en vida. É unha fábrica de claridade que traballa incesantemente para que todos respiremos. Non menos obvio resulta que case todas as civilizacións foron cimentadas sobre bosques. Ata unha parte do petróleo, do gas e todo o carbón que agora nos move era unha selva que tragou a terra hai millóns de anos. O bosque é o seu propio manancial e funda o seu propio clima». E, de feito, como tamén destaca Araújo, a propia palabra «humanidade» procede de «humus», imprescindible para a vida e completa creación do bosque.