Afundación, ABANCA e o Concello de Barbadás asinan un convenio para amosar «Berces de vida»
O Concello de Barbadás, ABANCA e Afundación, a Obra Social de ABANCA, rubricaron hoxe un convenio para amosar «Berces de vida. De paseo polos bosques de España», unha exposición comisariada polo premiado biólogo e divulgador Joaquín Araújo. Na sinatura estiveron Xosé Carlos Valcárcel, alcalde do Concello de Barbadás; Mateo Alonso San Román, coordinador institucional de ABANCA en Ourense; e Beatriz Fernández-Anguiano, coordinadora institucional de Afundación en Ourense e Lugo.
As imaxes están dispoñibles aquí.
«Berces de vida. De paseo polos bosques de España» inaugurarase o vindeiro 18 de abril e permanecerá aberta ata o 16 de maio na Sala de Exposicións da Casa da Cultura Manuel María de Barbadás, de luns a venres en horario de 8.30 a 14.30 h e de 16.00 a 20.00 h. Está incluída no proxecto «Corrente cultural», un programa enfocado á promoción de actividades culturais máis alá das sedes de Afundación.
A exposición, articulada por 26 fotografías cheas de luz, cor e beleza, retrata os diferentes ecosistemas boscosos de todas as comunidades autónomas de España e pretende servir de chamada de atención sobre a necesidade de conservar uns espazos imprescindibles para a vida no noso planeta. Complementadas con textos explicativos de Joaquín Araújo, estas imaxes reflicten o compromiso de todas as entidades participantes neste proxecto coa preservación do medio ambiente.
En palabras do comisario da exposición, «o bosque é o lugar onde a luz se converte en vida. É unha fábrica de claridade que traballa incesantemente para que todos respiremos. Non menos obvio resulta que case todas as civilizacións foron cimentadas sobre bosques. Ata unha parte do petróleo, do gas e todo o carbón que agora nos move era unha selva que tragou a terra hai millóns de anos. O bosque é o seu propio manancial e funda o seu propio clima». E, de feito, como tamén destaca Araújo, a propia palabra «humanidade» procede de «humus», imprescindible para a vida e completa creación do bosque.