ABANCA e Afundación asinan un convenio para amosar toda a beleza de «Os nosos océanos» co Concello do Carballiño
Afundación e ABANCA asinaron hoxe, co Concello do Carballiño, un convenio para a realización da exposición «Os nosos océanos», desenvolvida en colaboración coa Editorial Planeta e baixo o comisariado de Joaquín Araújo, experto en medio ambiente e reputado ecoloxista. O acto de rúbrica contou coa asistencia do alcalde do Carballiño, Francisco José Fumega Piñeiro; a coordinadora institucional de Afundación de Ourense e Lugo, Beatriz Fernández-Anguiano; Mateo Alonso San Román, coordinador institucional de ABANCA en Ourense; e Manuel Dacal, concelleiro de Emprego, Industria e Dinamización Turística.
As imaxes están dispoñibles aquí.
Con esta exposición, Afundación Obra Social ABANCA sae á rúa cunha achega cultural de primeira orde que xunta mensaxe, beleza, transcendencia e emoción. Esta proposta é parte do proxecto de capilaridade cultural de Afundación que considera a arte como un instrumento imprescindible para fomentar o coñecemento e o desenvolvemento colectivo. Así, a Obra Social de ABANCA, impulsa a capilaridade da cultura en Galicia, ampliando a oferta artística máis aló das súas sedes e trasladándoa ás localidades galegas para desenvolver tamén nelas as actividades da entidade. «Os nosos océanos» é así mesmo unha invitación para reflexionar sobre o impacto da nosa actividade, así como sobre a necesidade perentoria de incorporar a sostibilidade á nosa forma de vida.
A exposición «Os nosos océanos» encherá a praza Emilia Pardo Bazán coas imaxes máis espectaculares da biodiversidade mariña: baleas iubartas, osos polares, peces bolboreta, a quenlla peregrina ou unha colectividade de golfiños, poboan, entre outras moitas especies, as imaxes cheas de cor e vida da mostra. Porque todo o que coñecemos como vida non só procede dos océanos, senón que segue dependendo deles. Nos mares escóndense inxentes sorpresas que alimentarán durante séculos a curiosidade dos científicos e a admiración de todos os demais. O que con esta exposición preténdese é espertar o recoñecemento de que os océanos son berce de vida, manancial de todos os mananciais, reguladores de todos os elementos básicos do clima, depuradora natural das contaminacións e fornecedores de alimento e incontables materias primas.