Comentarios
Igual que no conto "O león, a bruxa e o armario" de C. S. Lewis, o armario, situado no fondo da estancia, compórtase como un obxecto vivo, a porta dun mundo máxico que se abre á imaxinación.
O espazo compositivo preséntase fragmentado, estruturado a través de diferentes campos de cor de gama neutra que configuran un ambiente suxestivo, con contrastes de luces e sombras. A luz describe un percorrido que convida a penetrar no faiado para descubrir ese universo privado que o artista proxecta porque para el, "a pintura exprésase a través do seu propio misterio, do seu silencio".
Domina o sentido da xeometría, da liña, tanto na configuración espacial como na personaxe, o roupeiro, deseñado como un rectángulo que atrae as notas cromáticas máis intensas, o azul, o vermello e o amarelo que contrastan cos pardos, coa atmosfera entristecida e na penumbra do cuarto.
A acuarela de trazo delicado, case volátil, sométese ó dictado do debuxo e encáixase entre os sutís guións do lapis, permitindo, á súa vez, que a cor se exprese con liberdade mediante manchas, superposicións e quebras que alteran a planitude do moble.
O armario introduce na obra o sentido do íntimo e do escondido ó se tornar en metáfora, no cofre que atesoura os segredos e desexos da alma.
EXPOSICIÓNS:
"Jorge Castillo". Setembro de 1977. Sala de Arte. Caixa de Aforros Provincial de Pontevedra, Pontevedra.
