«Quedamos no palco, quedamos coa clásica» chega de novo ao noso Teatro en Vigo, brindando a oportunidade á mocidade de ESO e Bacharelato de poder acceder aos concertos de clásica tan só a cambio de produtos non perecedoiros, que deberán depositar nos puntos habilitados á entrada do edificio, con motivo do programa solidario Cultura por Alimentos. Así, os recitais programados para os próximos meses ata xuño, darán cabida a estudantes, que poderán desfrutar das grandes orquestras galegas, xunto con directores recoñecidos e grandes instrumentistas.
Ademais, e en consonancia coa difusión da cultura que caracteriza a Afundación, as persoas menores de 35 anos poderán comprar a súa entrada media hora antes do recital e na billeteira do teatro a 5 euros.
Neste concerto da tempada de música clásica do Teatro Afundación Vigo e enmarcado en «Quedamos no palco, quedamos coa clásica», a Real Filharmonía de Galicia (RFG) estará dirixida por Rita Castro Blanco (Portugal, 1993). A directora é, para os medios de comunicación especializados do seu país, a promesa emerxente da dirección orquestral en Portugal.
As entradas para o concerto, o segundo dos que forman parte da tempada de clásica de Afundación en Vigo no primeiro
semestre de 2024, xa están dispoñibles en Ataquilla.com.
A RFG propón para o 26 de xaneiro un repertorio composto por obras de Mozart, e dos compositores contemporáneos Arthur Honneger e Bohuslav Martinů. As dúas obras do gran compositor austríaco Wolfgang Amadeus Mozart servirán para abrir e pechar o concerto. Na apertura, KV92 de As vodas de Fígaro, e no peche, a Sinfonía núm. 38 Praga, K. 504. Completan o programa a Pastorale dété (Summer pastorale), H31 de Arthur Honneger (Suiza, 1982-1955) e a Toccata e Due Canzoni, H 311 do compositor checo Bohuslav Martinů (1890-1959).
O público da tempada de clásica de Afundación terá a súa seguinte cita o 23 de febreiro. A Real Filarmonía de Galicia volverá ao Teatro da Obra Social de ABANCA acompañada pola pianista Judith Jáuregui.