Exposición: A VIDA LENTA. Memorias e ritmos do rural galego. OURENSE

Novo proxecto expositivo interdisciplinar que reflexiona sobre as formas de vida vencelladas ao rural galego, a súa iconografía, a súa presenza na cultura contemporánea e a sostibilidade do medio. Da man de Aser Álvarez, director, guionista e produtor galego, «A vida lenta. Memorias e ritmos do rural galego», conxuga máis de 50 fotografías, máis de 40 minutos de pezas audiovisuais, fragmentos poéticos e música nun proxecto pensado como instrumento para fomentar o debate contemporáneo e a revisión dunha realidade esencial para a conformación da identidade en Galicia.

NOVA VISITA GUIADA! con ASER ÁLVAREZ e MOISÉS QUINTAS | 6 ABR | 19.00 h 

Prazas limitadas!

Inscríbete AQUÍ

[Accede a cambio de alimentos non perecedoiros para contribuír cos bancos de alimentos locais. #CulturaporAlimentos]

O músico Moisés Quintas, creador da banda sonora da exposición, acompaña a visita interpretando fragmentos de diversas pezas tradicionais a través de frautas primitivas que foron usadas nas aldeas galegas ao longo dos séculos.

ASER ÁLVAREZ | comisario

Tamén podes acceder á VISITA VIRTUAL clicando no botón da esquerda.

A EXPOSICIÓN
Conta con valiosos fondos documentais fotográficos e cinematográficos sobre o rural galego desde 1930 ata finais do século XX: a colección de Jaume Lloveras e Juan Piñeiro Andión (1978-1986), o arquivo do fotógrafo lugués Carlos Valcárcel e os Fondos Fotográficos do Ministerio de Agricultura, Pesca e Alimentación. Cada un deles achega unha perspectiva diferente sobre unha mesma realidade, e é esta diversidade de perspectivas a que favorece unha precisa análise sobre as representacións do rural, aquelas que foron constituíndo, tamén lentamente, o imaxinario colectivo.

Algúns dos poetas gañadores do Premio de Poesía Afundación, como Olalla Cociña, Miguel Sande, Gonzalo Hermo, Oriana Méndez e, como novidade, a galardoada na última edición Medos Romero, tamén amosan na mostra varios versos co obxectivo de reflexionar sobre a presenza da natureza na cultura contemporánea.

E a nivel musical, Moisés Quintas crea a banda sonora da mostra, recreando o chiar dos carros, o ouvear dos lobos, o xirar das rodas de muíño ou o cravuñar das gadañas. El é un estudoso dos alalás, canto popular galego lento e executado nunha serie de notas sobre unha soa sílaba, formando un adorno, que remata frecuentemente con ‘ailalala, ailalala’ ou semellante.

Quintas inspírase especialmente na obra fotográfica de Carlos Valcárcel. 

Eu son un namorado dos alalás. Comecei a tocalos con distintos instrumentos que imitan a natureza, o vento, os paxaros, o son do carro… Instrumentos que nacen da mesma terra, de barro, de cana, de óso ou corno… As frautas que interpreto reflicten a evolución deste instrumento, tocándose en Galicia en distintos momentos e contextos ao longo da historia, desde frautas pastoriles feitas polos propios pastores en cana, óso ou corno ata outras máis elaboradas talladas en madeira ou metal e fabricadas por artesáns cunha finalidade máis profesional, para seren empregadas en grupos de música tradicionais ou bandas populares.

Velaquí as distintas frautas que toca Moisés Quintas na banda sonora: frauta de óso de cabrito, frauta de corno de cabra “Caramela”, frauta de barro cocido “Ocarina”, de bico de cana “Pitos Galegos” e frautas traveseiras de cana, de madeira “Requinta” e de metal.

Con esta iniciativa, Galicia convértese na primeira comunidade de España en abordar unha exposición monográfica cos fondos catalogados polo Ministerio de Agricultura, Pesca e Alimentación. 

Esta exposición desenvólvese nunha conxuntura en que a preocupación pola conciliación persoal, a convivencia co medio natural e a análise dos nosos ritmos vitais está a experimentar unha reflexión intensa a consecuencia da pandemia. A teor deste contexto, o traslado ao rural ou a núcleos de poboación máis reducidos preséntase como un garante de calidade de vida. O que noutrora fora deostado como antítese do progreso, contémplase agora como posible solución dos desequilibrios de demografía territorial.

PUBLICACIÓNS Á VENDA relacionadas coa temática desta exposición:

ANACOS DO RURAL: Unha revisión documental do pasado recente da Galicia rural, libro + 2 DVD | MERCAR

GALICIA RURAL: Un debate contemporáneo sobre o rural de Galicia,  libro + DVD | MERCAR

FILLOS DA TERRA de Juan Rodríguez | MERCAR

VIRXILIO VIÉITEZ: ÁLBUM de Manuel Sendón e Xosé Luís Suárez Canal | MERCAR

RAMÓN CAAMAÑO: RETRATOS DA COSTA DA MORTE de Manuel Sendón e Xosé Luís Suárez Canal | MERCAR