Tenda solidaria a favor do comedor de San Francisco, Espazo +60 Pontevedra

Todos os martes, en horario de 17.30 a 19.30 horas, do 19 de decembro ao 2 de xaneiro estará aberta a tenda solidaria do Espazo +60 Afundación de Pontevedra, cuxos beneficios se destinarán ao comedor de San Francisco.

Os bolsos que se poden comprar neste mercado solidario son pezas únicas elaboradas por vinte e dúas persoas voluntarias do Espazo +60 participantes durante todo o curso no obradoiro solidario, dirixido pola socia voluntaria Mª Ángeles Pérez García.

Esta actividade ten como finalidade o desenvolvemento de hábitos de reciclaxe e promove a creatividade e a imaxinación ao tempo que fomenta a solidariedade e a cooperación entre os participantes. Está enmarcada dentro do programa "O valor da experiencia" da área de Envellecemento Activo, que ten como obxectivo potenciar o papel activo das persoas maiores na sociedade e o desenvolvemento de actividades de voluntariado.

A inauguración, aberta ao público en xeral, terá lugar o 19 de decembro, ás 17.30 horas.