Paseos pola historia e a cultura de Betanzos e a súa contorna: desde San Miguel de Breamo a Ares pasando por Redes, Espazo +60 Betanzos

O Espazo+60 Afundación de Betanzos organiza, unha vez ao mes, un paseo pola cultura da historia de Betanzos e a súa contorna, onde as persoas participantes poden achegar os seus coñecementos para descubrir recunchos e coñecer vestixios da historia do municipio. 

A camiñada deste mes terá lugar o 30 de maio, luns, desde San Miguel de Breamo a Ares.

Comezaremos a ruta na fermosa igrexa de San Miguel de Breamo, románica do s. XII, situada a 300 metros sobre o nivel do mar. Gozando de espectaculares vistas sobre a desembocadura do Eume e do arco Ártabro descenderemos a Pontedeume, vila conectada historicamente con Betanzos a través dos señores de Andrade. Continuaremos bordeando a costa da ría de Pontedeume e Ares ata a pintoresca vila mariñeira de Redes onde faremos a parada para xantar. Continuaremos camiñando pola praia de Seselle ata a entrada de Ares, onde percorreremos as pasarelas sobre a zona húmida do río Xunqueira, remtatando a ruta no paseo marítimo de Ares tras camiñar uns 14 km.

O horario será:

10.30 - Saída do bus en Betanzos

11.00 - Chegada á igrexa de San Miguel de Breamo

11.15 - Comezamos a camiñar

14.15 - Chegada a Redes (8,2 km) 

Xantar. Reservamos menú do día nas instalacións do Club de Tenis de Redes. Menú do día, 10 €

15.45 - Reemprendemos marcha

18.00 - Chegada a Ares (5,7 km)

19.00 - Recóllenos o bus de volta

19.45 - Chegada a Betanzos

Imprescindible levar calzado adecuado para camiñar -usado, non a estrear- e que suxeite ben o pé, botella de auga, algo de froita, chocolate, froitos secos,...

É conveniente levar bastóns e viseira, pórse crema protectora na cara, pescozo e mans. Non sabemos que tempo fará, haberá que velo dous días antes para dar consellos se se ve necesario.

Cómpre levar chaleco reflector.

A actividade será conducida por persoas voluntarias socias do Espazo +60 de Betanzos, e forma parte do programa voluntariado "O valor da experiencia" da área de Envellecemento Activo de Afundación, que ten como finalidade potenciar o papel activo das persoas maiores na sociedade e favorecer o desenvolvemento de accións interxeracionais e de voluntariado.

Prezo: 25€ (mínimo 12 persoas) ou 20€ (15 persoas)

Prazas limitadas. Apúntate no Espazo +60 ou chamando ao 981 772 911