Oriana Méndez gaña o XVIII PREMIO DE POESÍA AFUNDACIÓN

«A obra gañadora caracterízase por unha voz feminina que mantén un ritmo sostido a través de versos depurados e conmovedores cheos de autenticidade e reveladores dos espazos máis privados do eu. Afloran, con precisión léxica, vivencias esenciais e significativas que se manteñen coma unha memoria vivida en diálogo permanente con outras voces e referentes [...] a eufonía duns versos que incitan a unha lectura en voz alta enunciados cun gran dominio dos recursos da oralidade». En palabras do xurado, a obra Interna de Oriana Méndez. 

 

As escritoras Marica Campo, Eulalia Agrelo Costas, e o xornalista César Lorenzo Gil; Xabier Castro Martínez, escritor e secretario do xurado; e Luis González Tosar, presidente do Centro PEN de Galicia e asemade deste xurado, foron as persoas encargadas neste XVIII Premio de Poesía Afundación de resolver o fallo de entre un total de 27 traballos inéditos. 

 

ORIANA MÉNDEZ

Vigo (1984). Licenciada en Filoloxía Galega pola USC, o seu labor poético comezou no ano 2000 na revista cultural A Caramuxa, de Noia. A esa intervención seguiranlle colaboracións en publicacións colectivas de grupos como Burla Negra, e na revista Mealibra, así como en numerosos recitais poéticos, encontros e proxectos de acción poética, como «A revolta das letras».

No ano 2003 colaborou na elaboración do libro Xuro que nunca volverei pasar fame publicado por Redes Escarlata. En 2014 gaña o Premio de poesía Concello de Carral co poemario O que precede a caída é branco e en 2019 o premio do quinto certame de poesía Rosalía de Castro de Padrón coa súa obra O corazón pronúnciase extenso. Autora dos poemarios Derradeiras conversas co Capitán Kraft (2007), Cero (2011), O que precede a caída é branco (2015) e O
corazón pronúnciase extenso (2019), colabora tamén en diversas obras colectvas.

 
O Premio de Poesía Afundación implica a publicación do libro na colección «Arte de trobar» e unha dotación económica de 6000 euros. Comezou o seu percorrido no ano 2002 a instancias do PEN Club de Galicia e de Afundación. No seu elenco de gañadores figuran poetas galegos como Xavier Seoane, María do Cebreiro, Román Raña, Arcadio López Casanova, Marilar Aleixandre, Carlos Penelas, Luís Vale Regueiro, Emma Pedreira, Xavier Rodríguez Baixeras, X. Daniel Costas, Yolanda Castaño, Elías Portela, Miguel Anxo Fernán Vello, Olalla Cociña, Estíbaliz Espinosa, Gonzalo Hermo ou Miguel Sande, gañador da anterior convocatoria.

 

O premio, que celebra a súa décimo oitava edición, conta co apoio e a participación da Xunta de Galicia, cuxa implicación garante a súa estabilidade e contribúe a preservar esta cita de referencia na axenda cultural galega, á vez que estimula a creación literaria. Afundación e o Centro PEN de Galicia, tras case dúas décadas de implicación e compromiso coa poesía e coa literatura galega, continúan traballando por un xénero indispensable que, aínda que minoritario, serve de alicerce para a consolidación da renovación estética e para a normalización da lingua galega.