Exposición SACRIFICIO E ASCENSIÓN. Quince anos de cómics de DAVID RUBÍN. Pamplona
O Salón do Cómic de Navarra acolle «Sacrificio e ascensión. 15 anos de cómic de David Rubín», unha exposición antolóxica do creador ourensán imprescindible da ilustración contemporánea. Con máis de 230 obras, esta mostra é a máis ampla nas doce edicións do salón e poderá visitarse ata o próximo 3 de outubro no Palacio do Condestable de Pamplona.
A exposición presentouse en 2020 en Ourense, a cidade natal do artista e, tras o seu paso polo prestixioso certame, poderá visitarse na Sede Afundación A Coruña para coñecer as diferentes etapas, influencias e series desta gran figura da ilustración, partindo dos seus primeiros traballos en Galicia para acabar cos últimos no mercado americano.
David Rubín (Ourense, 1977) é un dos historietistas españois máis recoñecidos nos últimos anos. É cofundador do colectivo Polaqia, formado por historietistas de Galicia e recoñecido con varias candidaturas aos pretixiosos premios Eisner. Desde uns duros comezos en que o cómic era unha paixón, máis ca un traballo, ata o momento actual, en que deviu nun dos historietistas máis solicitados do panorama internacional, esta é a exposición máis extensa, completa e ambiciosa das realizadas sobre este autor, con máis de 230 obras, en que se reflicten todos os seus fitos creativos.
Na súa primeira etapa como profesional destacan títulos como La tetería del oso malayo ou Cuaderno de tormentas; mais non é ata El Héroe, cando consegue o éxito nacional e internacional, xa que se publica no estranxeiro, abríndolle a porta a outros mercados. Ségueo Beowulf, outra obra sobresaínte que o confirma coma un dos autores fundamentais do panorama actual. Comeza así a traballar para o mercado americano en series coma Aurora West, La Ficción, Ether ou Sherlock- Frankenstein, combinando os devaditos traballos con outros realizados directamente para o mercado español, como Gran Hotel Abismo ou Fuego, o seu último proxecto aínda en desenvolvemento, que verá a luz en 2021 da man da editorial Astiberri.
