Mostra «O universo musical de Andrés Gaos (1874-1959)». A Coruña
A partir do 10 de outubro inauguramos na Sede Afundación da Coruña unha mostra excepcional sobre o recoñecido compositor galego Andrés Gaos. Convidámoste a visitar, a través do fondo conservado polo fillo Andrés Gaos Guillochón, un inxente material que atesoura partituras, borradores, correspondencia, críticas, programas, fotografías, dedicatorias e mesmo varios violíns usados polo propio Gaos. A mostra «O universo musical de Andrés Gaos (1874-1959)», en colaboración coa Universidade de Santiago de Compostela, bríndache a posibilidade de saber dun dos grandes artistas destacados dentro e fóra das nosas fronteiras cunha vida e obra dignas de admirar. Non perdas detalle ata o 14 de decembro na cidade herculina.
INAUGURACIÓN | 10 de outubro | 18.30 h | Inscríbete aquí
CONCERTO «O violín restaurado de Andrés Gaos» | 8 de outubro | 20.00 h | DE BALDE | MÁIS INFO
Reserva aquí as túas invitacións
Florian Vlashi, un dos violíns primeiros da Orquesta Sinfónica de Galicia, interpretará a Gaos con un dos violíns que se amosarán na exposición e que foi restaurado recentemente polo Consello da Cultura Galega. Canda el, Julio Mourenza no piano.
A MOSTRA
A exposición «O universo musical de Andrés Gaos (1874-1959)», que comisarían os profesores da USC Montserrat Capelán e Javier Garbayo, está formada por numerosos obxectos e materiais contidos no Fondo Gaos, doado recentemente pola familia Gaos Guillochón á Universidade de Santiago de Compostela. Estrutúrase a mostra en seccións temáticas que permiten ver as súas relacións familiares, o seu tempo, a súa faceta como intérprete, compositor e director ou a súa relación coa Arxentina e con Galicia, e nela expóñense tamén os violíns que se conservan de Gaos, dous deles procedentes do fondo da USC, un dos cales foi restaurado recentemente grazas ao Consello da Cultura Galega, e outros dous cedidos polo Concello da Coruña. Outra documentación completa a exposición: programas, cartas, fotografías, críticas, partituras e documentación persoal.
Este proxecto permitiranos saber das múltiples e diversas facetas de Andrés Gaos, intérprete, docente, director, e un dos grandes compositores galegos do século pasado. A súa obra compositiva conta con máis de 70 títulos incluíndo repertorio escénico, orquestral, pianístico, para violín, para violoncello, e para voz e piano. Escóllese este 2019 como «Ano Gaos», cadrando co 60 aniversario do seu pasamento.
Ven coñecer a vida e obra dun dos grandes compositores galegos do século pasado por xenerosidade da súa familia, que custodiou durante anos un incrible fondo, hoxe doado á Universidade de Santiago de Compostela. Esta xenerosa e comprometida entrega pon ao alcance de toda Galicia poder gozar dun anaco máis do patrimonio cultural a partir dun tesouro que amosa un encomiable traballo e un talento extraordinario, organizado e catalogado celosamente durante anos por parte do fillo do artista, Andrés Gaos Guillochón.
VISITA VIRTUAL Preme aquí.
Andrés Gaos Berea (1874-1959) foi un importante compositor, intérprete, director de orquestra e docente galego. En 1874 nace na Coruña no seo dunha importante familia de músicos. Aos 6 anos trasládase a Vigo onde o seu pai rexentará, na rúa Príncipe, unha tenda e un salón musical. Comeza os seus estudos co violín a idade temperá, e aos 9 anos dá os seus primeiros concertos con grande éxito por parte da crítica. Bolseiro pola Deputación da Coruña, continúa a súa formación con Jesús de Monasterio en Madrid e con Eugène Isaÿe en Bruxelas. Unha vez finalizados os seus estudos, realiza diferentes xiras por todo o mundo, actividade que continuará ao longo da súa vida. En 1895 recala na Arxentina, país en que fixa a súa residencia permanente ata o seu pasamento, tras unha pequena estancia en Uruguai e algún período posterior en Francia.
Podes saber más do artista aquí.
Entrevista a Montserrat Capelán en La Opinión de A Coruña sobre a exposición de Andrés Gaos.
