Exposición NÓS TAMÉN FOMOS EMIGRANTES. Fotografías da Axencia EFE sobre a emigración española no s.XX. Barbadás
SALA DE EXPOSICIÓNS CASA DA CULTURA MANUEL MARÍA DE BARBADÁS [C/ San Bernabé, 37]
Trátase dunha valiosa escolma fotográfica da Axencia EFE que nos leva a esa realidade histórica da emigración, galega e española, a través dunha síntese de corenta imaxes tiradas coa ollada profesional e humana dos fotoxornalistas da época.
Este é un proxecto de Corrente Cultural, unha iniciativa coa que promovemos desde Afundación, a Obra Social de ABANCA, e ABANCA un circuíto expositivo por diferentes vilas da xeografía galega, e en colaboración cos concellos ou outras entidades locais.
Mostra itinerante en colaboración con Afundación Obra Social ABANCA.
A MOSTRA
«Nós tamén fomos emigrantes» recolle unha escolma de imaxes dos arquivos da Axencia EFE que posúe un dos fondos fotográficos máis importantes de España sobre a emigración galega e española. Son retratos próximos que narran as circunstancias vitais da xeración das nosas nais e pais e tamén de avós e avoas, que abandonaron a súa terra na procura dun futuro mellor.
«A esencia dun fotógrafo é estar no lugar onde se produce a nova. Un dos grandes da fotografía xornalística, Robert Capa, que foi correspondente de guerra en moitas frontes e acabou morrendo ao pisar unha mina en Indochina, dicía que cando a foto non é boa é porque o fotógrafo non estaba preto dabondo. A exposición preséntanos, en branco e negro, unha síntese das nosas emigracións plasmada por fotoxornalistas de EFE. É a historia de milleiros de persoas que tiveron que abandonar a súa terra para sobrevivir. Son os anos cincuenta, sesenta, décadas de fame, de subdesenvolvemento, de falta de liberdade, mais tamén de construción, de aforrar a peseta para un arelado retorno».
Miguel Ángel Gozalo, director da Axencia EFE de 1996 a 2004.
DIDÁCTICA
A Área Educativa de Afundación pon a disposición da comunidade escolar un material didáctico coa finalidade de achegar un dos fenómenos máis importantes da historia contemporánea galega á xente nova, desde o punto de vista do arquivo fotográfico da Axencia EFE.- Fuga de cerebros | 4º de primaria a 2º ESO
Esta exposición enmárcase en CULTURA POR ALIMENTOS, unha iniciativa de Afundación en prol de FESBAL (Federación Española de Bancos de Alimentos). Accede e colabora, doando algún alimento non perecedoiro, que irá destinado ao banco de alimentos local.
Entra aquí e infórmate polo miúdo.
CORRENTE CULTURAL
Este proxecto Corrente Cultural é unha aposta de ABANCA e Afundación, a Obra Social de ABANCA, para espallar cultura por toda Galicia, polos diferentes concellos e contando coa súa colaboración, construíndo unha rede de calidade que leve novas propostas máis alá dos nosos edificios. As iniciativas que conforman este ciclo parten dunha produción de nivel, cun interese específico para a comunidade e unha estreita vinculación coas nosas tradicións e historia.
Actividade do Xacobeo 21-22
