Exposición «MYSELFIE. Asociación Galega da Enfermidade de Dent», en Vigo
Visita a mostra pictórica integrada por pezas realizadas a raíz da iniciativa Art for Dent xurdida ao abeiro da Asociación Galega da Enfermidade de Dent e titulada «Myselfie». O proxecto artístico, cen por cen solidario, que se pode ver ata o 2 de marzo, naceu da implicación de Hugo, un neno de Brión diagnosticado con Dent, no mundo da pintura como terapia e da man do seu pai. Con creacións dinámicas e cromaticamente chamativas, as obras articúlanse nunha mostra itinerante que contribúe a visibilizar a necesidade de promover a investigación para solucionar os efectos desta patoloxía. Así, colabórase co equipo científico de NefroChus, o Laboratorio de Xenética das Enfermidades Renais do Complexo Hospitalario Universitario de Santiago de Compostela.
ENCONTRO | 27 XAN | 19.30 h
Inscríbete AQUÍ de balde!
No marco desta exposición, o 27 de xaneiro podes asistir a un encontro de concienciación con Fernando Yáñez, pai de Hugo e secretario da Asociación Art for Dent; Miguel Ángel García González, responsable do proxecto de investigación da enfermidade de Dent no Laboratorio de Xenética de Enfermidades Renais (NEFROCHUS) do IDIS; e Pablo Zentolo, responsable da empresa Rei Zentolo, comercializadora dos produtos solidarios con que se financia o proxecto.
A iniciativa expositiva, que podes ver na Sala I da Sede Afundación de Vigo (rúa Policarpo Sanz 26), desenvolve máis actividades de visibilización. Por unha parte, a actuación en espazos urbanos a través de murais en que o eclecticismo artístico é a base das motivadoras pezas pintadas. Pola outra, a elaboración de produtos de merchandising solidarios coma cuncas e camisolas.
A Asociación Galega da Enfermidade de Dent nace en maio de 2021 a iniciativa dun grupo de catro familias galegas con nenos afectados por esta patoloxía en Lugo, Muros, Pontevedra e Brión. Coñecedores da existencia dunha investigación en marcha, e do proxecto Art for Dent en Galicia para dar visibilidade a esta enfermidade minoritaria, deciden unirse para sumar esforzos e axudar no financiamento da busca de solucións. Xuntos conséguese máis e tamén se obtén maior apoio para afrontar as incertezas e as dúbidas que afectan como pacientes e familiares. Na actualidade, integran a asociación as catro familias galegas e unha familia asturiana (único caso de Dent diagnosticado nesa comunidade).