Día Mundial do Medio Ambiente en Naturnova 2015, en Vigo

O 5 de xuño é o Día Mundial do Medio Ambiente e para celebralo, o sábado 6 de xuño, hai unha xornada de portas abertas en Naturnova. O centro de interpretación da natureza de Vigo permanecerá aberto de 17.30 a 20.30 h.

O Día Mundial do Medio Ambiente non debe ser só un símbolo no noso calendario, senón unha reivindicación permanente, buscando implicarnos a todos os niveis e comprender que a natureza é a base do noso día a día, a pesar de que os novos xeitos de vida das sociedades industrializadas nos leven a un maior illamento e descoñecemento dela.

Pola natureza e por nós mesmos, apoiemos o coidado e o respecto polo medio ambiente a través de pequenas rutinas diarias que son síntoma dunha sociedade máis consciente e avanzada e que poden facer moito polo planeta. Debemos pensar que se todas as persoas poñemos o noso gran de area, sumamos toneladas. 

Aquí van algunhas ideas eco para comprometernos a través das nosas actividades cotiás:

1. Intenta consumir só aquilo que precises.

2. Merca os alimentos que se presenten con menos plásticos e envases.

3. Rexeita no teu supermercado as bandexas de poliestireno porque non son reciclables e faino saber (A día de hoxe están prohibidas en numerosos sitios, por exemplo en Nova York están prohibidas a partir do 1 de xullo)

4. Limpa sen tóxicos o teu fogar botando man de produtos naturais coma o vinagre, limón ou xabóns naturais.

5. Evita os alimentos envasados en Tetra Brik

6. Escolle na medida do posible produtos envasados en cartón ou vidro, antes que en plástico.

7. Leva sempre as túas bolsas da casa para facer calquera tipo de compra.

8. Non abuses do aire acondicionado no verán.

9. Merca verduras e froitas frescas de tempada.

10. Abandona o uso de ambientadores e sprays na casa.

11. Marca un mínimo de 20 min ao día para faceres unha pequena escapada á natureza, aínda que só sexa sentáreste na herba dun parque da túa cidade. 

Todas estas medidas poden facer máis polo medio ambiente do que imaxinas, e tamén pola túa propia saúde e a da túa familia e animais de compañía.

Conciénciate e conciencia, dar exemplo é o máis intelixente.

Se te achegas a Vigo, visita de balde o noso centro interactivo Naturnova o 6 de xuño, entre as 17.30 e as 20.30 h.

Máis información no 986 120 088 ou en naturnova@afundacion.org