Conferencia con CARLOTA SÁNCHEZ-MONTAÑA: Do presente coñecido ao futuro por coñecer: a educación chega tarde. En Lugo

Transcorridas xa dúas décadas do século XXI, fomos testemuñas dun proceso de cambio acelerado por unha imparable transformación tecnolóxica e dixital que xa revolucionou a nosa forma de vivir.

Este cambio aínda vai coller máis velocidade nesta década, unha grande explosión tecnolóxica e a loita contrarreloxo contra o cambio climático van marcar a definición das profesións do futuro.

Sen dúbida, este novo marco incerto e inimaxinable, a día de hoxe, parece unha materia pendente para a Educación.

Esta conferencia achega algunhas claves para acompañar a educación nos novos retos que xa están aquí e define en grandes liñas o contexto en que van medrar e a desenvolverse as nosas fillas e fillos.
 
CARLOTA SÁNCHEZ-MONTAÑA PUGA
Licenciada en Dereito e Empresariais por ICADE (E-3). Master en Administración de Empresas por IESIDE. International Business Programme, Universidade de Georgetown. Programa Executiva Consellería de Traballo, Xunta de Galicia.

Na actualidade é coordinadora adxunta da área de Educación Superior de Afundacion, e desde hai máis de 30 anos profesora titular da área de finanzas de IESIDE. Anteriormente traballou como analista de Riscos, controler e directora de distintas áreas funcionais, e ocupou diferentes postos no equipo de dirección.

Especializada na área de finanzas, é profesora en cursos de grao, posgrao e dirección e relatora en numerosos seminarios e xornadas en temas relacionados con financiamento, emprendemento, liderado dentro do ámbito empresarial. Entre os seus intereses de investigación destaca o proceso de transformación que estamos a vivir como consecuencia da dixitalización da sociedade e os seus efectos sobre as nosas vidas.

Actualmente é unha das impulsoras e relatoras do programa de Educación Financeira de Afundación e participa tamén como relatora en actividades do programa Eduemprende, da Consellería de Educación da Xunta de Galicia.