Conferencia con José Antonio Marina «A educación do talento. Como poñer en acción a intelixencia». Santiago de Compostela
O filósofo, escritor e pedagogo español José Antonio Marina, ofrécenos a conferencia «A educación do talento. Como poñer en acción a intelixencia». O Auditorio ABANCA en Santiago de Compostela acolle o evento o 6 de febreiro, dentro do ciclo Educación s. XXI.
VER VÍDEO DA CONFERENCIA
O tema do momento, o que preocupa a todas as nacións, a todos os empresarios, a todos os políticos e que debería preocupar a todos os cidadáns é como podemos xerar talento? Nunha sociedade do coñecemento, cuxa economía estará baseada cada vez máis na ciencia e na tecnoloxía, a principal riqueza das nacións xa non é o territorio, nin a poboación, nin as materias primas, nin o capital: é o talento. Chamamos «educación do talento» á intelixencia triunfante, que é aquela que acerta a elixir as metas e consegue acadalas. Hoxe máis ca nunca somos conscientes da complexidade, a velocidade e o cambiante que vai ser a sociedade do mañá, pero tamén sabemos que a educación é a grande esperanza das sociedades, que temos que investir recursos nela e que ben dirixida levaranos a construír unha sociedade máis digna, xusta, onde todo o mundo poida desenvolver ao máximo as súas potencialidades.
Entrada gratuíta ata completar aforo.
JOSÉ ANTONIO MARINA
O seu labor investigador centrouse na elaboración dunha teoría da intelixencia que comece na neuroloxía e remate na ética. Marina escolleu diferentes formatos para presentar os resultados das súas investigacións: libros, artigos de xornal, conferencias, guións de televisión, ou crítica literaria. Considérase discípulo de Edmund Husserl, de quen lle fascinou a súa fenomenoloxía constituínte. E recoñece a influencia na súa obra dos psicólogos Piaget, Vygotsky, e Luria. Este último introduciulno á vez na neuroloxía e na lingüística.
O seu interese pola filosofía práctica levouno a emprender diferentes proxectos educativos, sociais e empresariais, que son unha mostra do que investiga e defende na súa obra escrita. Froito deste interese, puxo en marcha o movemento de Mobilización Educativa, e é presidente da Fundación Educativa Universidade de Pais, un conxunto de proxectos que inclúe a Universidad de Padres on-line, o proxecto pedagóxico líder en parenting, que ten por obxecto axudar aos pais no proceso educativo dos seus fillos. No ámbito da Fundación puxéronse en marcha proxectos como o da revista Enerxía Creadora e Universo UP. E a Cátedra de Economía Abierta co obxectivo de abrir o campo pechado da ciencia económica a todos os cidadáns, para axudarlles a entender o seu protagonismo económico e dese xeito poder tomar decisións responsables e críticas.
Marina tamén dirixe o Centro de Estudios en Innovación y Dinámicas Educativas ( CEIDE) unha iniciativa que trata de fomentar a reflexión e a excelencia educativas, e faino procurando proporcionar unha resposta aos interrogantes esenciais da educación: Que hai que ensinar? Como debe ensinarse? Quen ha de facelo e onde?
Dirixe a Cátedra Universidad Antonio Nebrija sobre Inteligencia Ejecutiva y Educación, para estudar o modo de xerar talento. É membro do Comité Científico da Fundación Alcol e Sociedade. E é Mentor da Área Filosofía del Talento y Educación para el Talento de Human Age Institute de ManpowerGroup.
Máis información sobre José Antonio Marina Torres aquí.
CICLO EDUCACIÓN S. XXI
Desde Afundación poñemos en marcha este programa de conferencias para dar a coñecer as últimas tendencias, estudos e teorías sobre a aprendizaxe a toda a comunidade educativa, nais e pais, estudantes, docentes e público en xeral. Grandes especialistas xa pasaron polas nosas sedes nas distintas cidades galegas: David Bueno, Xuxo Ruiz, Sergio Castro "Profesor10demates", José Torres, Belén Colomina, Anna Sans, Anxo Carracedo, Jorge Soto, Margarita Pino, César Bona, Javier Urra, Hernán Aldana, Vázquez Taín, Teresa Viejo, Irene Villa ou Álex Rovira. Un enfoque profesional que serve de apoio a familias e á área académica, dando a coñecer varios prismas e metodoloxías.