Conferencia «Mindfulness para familias: Educar para ser feliz», con Belén Colomina. Pontevedra

Ver conferencia

O venres 6 de abril a Sede Afundación de Pontevedra acolle unha nova conferencia do programa Educación no s. XXI, «Mindfulness para familias: Educar para ser feliz», impartida por Belén Colomina. O ciclo volve no mes de abril a Lugo e Pontevedra para informar familias, nais, pais, persoal docente e público en xeral de novas filosofías educativas para axudarnos na tarefa de educar e compartir coas nosas fillas e fillos, contando cun enfoque profesional que sirva de apoio tamén no eido académico. Coñeceremos distintos prismas, metodoloxías e estudos para que entre tod@s consigamos ser máis felices e axudarnos mutuamente. 

 

Prazas esgotadas. Podes seguir a conferencia en streaming dende aquí 

 

Belén Colomina, psicóloga e terapeuta Gestalt, tratará nesta conferencia temas que teñen que ver coa familia como grupo social primario, un dos sistemas onde se xesta a educación da nosa mocidade. As novas configuracións familiares e as múltiples demandas ás que se enfrontan, fan que a educación se converta nun reto. Mindfulness en familia é espertar ás posibilidades, beneficios e retos dunha educación consciente e intencionada. Acompañar as fillas e fillos no proceso de vivir plenamente, con valores e na dirección escollida, é dotalos das mellores ferramentas educativas.

 

Poderemos aprender a desenvolver habilidades tales coma a calma e a estabilidade mental, adestrar a conciencia corporal e emocional e actitudes e valores construtivos, colaborativos, que nos permitan coñecernos mellor para relacionarnos dun xeito saudable cos demais e con nós mesm@s.

 

BELÉN COLOMINA

Desde hai máis de 15 anos, o traballo de Belén Colomina está dedicado á psicoloxía e a psicoterapia individual e grupal. Ten traballado en proxectos con mocidade en risco de exclusión social, con medidas xudiciais, en proxectos de inserción así coma na formación para profesionais e familias de adolescentes.

O seu traballo e dedicación á psicoloxía é o mellor aval dos diferentes libros e manuais que leva escrito.

«Non podería resumir o que fago sen concretalo na miña crenza de que un mundo mellor é posible. A miña aposta pola xente nova, polo seu desenvolvemento psicolóxico san e polo acompañamento e psicoeducación ás familias, é o eixo central que sustenta a miña paixón pola psicoloxía, pola psicoterapia e por facilitar procesos saudables de crecemento.»

É psicoterapeuta Gestalt tanto no Instituto de Terapia Gestalt de Valencia(ITG), coma no centro especializado en mindfulness Elephant Plena. Tamén forma parte do equipo de intervención de Pedro García Aguado (Hermano Mayor do programa de cuatroTV).

Tanto a psicoterapia individual coma grupal, forman parte do eixo principal do seu traballo. É aquí onde Ura, unha intelixente cadela pastora, ás veces, a acompaña.

 

Podes saber máis sobre o traballo de Belén Colomina na súa páxina www.belencolomina.com