Teatro UN OSCAR PARA ÓSCAR, en Vigo

UN OSCAR PARA ÓSCAR
de Mario Hernández

Martes 21 NOV | 20.30 h.
1 h 30 min | Castelan | NRM 12

DIRECCIÓN: Mario Hernández
ELENCO: Jon Plazaola, Agustín Jiménez, Rebeca Sala, Mara Guil
PRODUCIÓN: Txalo Producciones e La Mandanga

 

Colle as túas entradas en ataquilla.com

 

CULTURA POR ALIMENTOS 

Coñeces o noso programa solidario? Accede a toda a información desde a nosa web para saber de todas aquelas actividades culturais que podes realizar nos nosos recintos por un intercambio de alimentos non perecedoiros, destinados aos bancos de alimentos locais, en colaboración con FESBAL, Federación Española de Bancos de Alimentos. As obras da Tempada de Abonos Afundación forman parte da rede de actividades adheridas á iniciativa, polo que te convidamos a deixar a túa doazón á entrada do edificio, no punto habilitado, cando asistas.

A ilusión compartida que nos move! Infórmate aquí

 

Estamos na cidade de Los Ángeles, o día que se celebra a cerimonia dos Premios da Academia, os Oscar; concretamente, nun modesto motel nos arredores da cidade, na habitación que servirá de escenario único, e onde a través dunha cristaleira se ve, de lonxe, o xigantesco cartel de Hollywood.

Aquí chegan Óscar Manzano, un mozo director cuxa curtametraxe foi nomeada aos premios, acompañado, nin sequera el sabe moi ben por que, polo ministro de Cultura Guillermo Barrientos, e a ministra de Facenda Irene Navarro. Entre continuas liortas dos dous políticos, que non se soportan, e a poucas horas de empezar a cerimonia, preséntase na habitación de Óscar a moza Pauline, unha “escort girl”, contratada ás agachadas por Guillermo para que finxa ser a noiva de Óscar durante a gala e a alfombra vermella...

Este imposible grupo de catro vivirá a noite máis tola das súas vidas nese illado motel, atopándose e desencontrándose en algo que nos une a todos: os nosos soños e todo o que perdemos no camiño para conseguilos.

 

Un Oscar para Óscar é unha homenaxe ao divertimento e o absurdo de Miguel Mihura e a súa icónica Tres sombreros de copa –non por casualidade comparten protagonista feminina co mesmo nome–, pero onde nalgún momento o espírito de Luis García Berlanga tomou as rendas. Se durante a súa primeira metade o ritmo e o ton se asemellan ao vodevil máis clásico e á comedia de enredo máis desatada –bonito paradoxo, verdade?–, na segunda, os personaxes alcanzan tal grao de mezquindade, compaixón, desprezo e tenrura, cóctel clave de todo o español, que a feira que se sucede perante os ollos do espectador non pode cualificarse senón de berlanguiana. Esta dobre personalidade dáse tamén nos nosos catro personaxes, pois todos desexan ser outra persoa, ou finxen selo (que é unha maneira de soñar esperto), xa sexa para a galería ou para si mesmos, cambiándose de nome e ata de fronte. Todos temos soños que queremos acadar, pero durante o traxecto para conseguilos quizais deixemos de ser a mesma persoa que ambicionou aquilo que perseguimos. Entón, de quen é o soño? Ningún lugar mellor para tentar responder a esta pregunta que alá onde os soños se fan realidade: Hollywood.

Escrita durante o máis arduo do confinamento, cando máis necesitaba(mos) soñar e rir, presentar ao espectador a Óscar, Pauline, Irene e Guillermo é, este si, un soño feito realidade, que son os únicos que merecen a pena ser compartidos. Coma a risa. Divertirnos xuntos e soñar xuntos, ese si é un Oscar polo que merece a pena vivir.