Afundación presenta o seu proxecto escolar, cultural e de sostibilidade «Plantando árbores con pinceis»
15.03.2022. Afundación, a Obra Social de ABANCA, presenta mañá no CEIP Rosalía de Castro de Lugo, ás 11.30 h, o seu novo proxecto multidisciplinar «Plantando árbores con pinceis», coa participación do alumnado de 5.º e 6.º de primaria e Marité Cores, coordinadora da Área de Cultura de Afundación; Pablo Castiñeira Olveira, xerente de Vella Escola; e M.ª Dolores Freire, directora do centro.
Neste encontro, as nenas e nenos da escola participarán na elaboración dun mural e na decoración dunhas bolsas de teas con pinturas fotocatalíticas anticontaminantes, para o que contarán coa guía de David Brey Vázquez, o artista que coordina a representación. Deste xeito, Afundación, combina a sostibilidade, a cultura e a formación nun mesmo proxecto no que se incide no imprescindible coidado do medio ambiente para garantir un mundo acorde cos principios que guían os ODS 2030. O alumnado aprenderá que o uso deste tipo de pigmentos é útil dado o seu poder de absorción do CO2 ambiental, que consegue que cada metro cadrado pintando con eles iguale o efecto depurativo dunha árbore adulta. Tras unha experiencia piloto desenvolvida ao longo de 2021, a actividade preséntase agora para incluírse entre as propostas que a Área Educativa de Afundación ofrece aos centros escolares de toda Galicia.