ABANCA e Afundación presentan desde hoxe en Valdoviño a exposición «Auga. O sangue da terra»

11.04.2022. A Sala de Exposicións Casa da Cultura do Concello de Valdoviño acolle desde hoxe, luns, 11 de abril, a exposición fotográfica «Auga. O sangue da terra», de Manuel Valcárcel, unha iniciativa posible grazas á colaboración entre o Concello de Valdoviño, ABANCA e Afundación. A mostra, de entrada libre e gratuíta, permanecerá aberta ao público ata o vindeiro o vindeiro 15 de maio, de luns a sábado, de 12.00 a 14.00 h e venres de 17.00 a 19.00 h, e os domingos de 10.00 a 14.00 h. En Semana Santa, do 11 ao 17 de abril, o horario será de 12.00 a 14.00 h. No acto de inauguración de hoxe, estiveron Alberto González Fernández, alcalde de Valdoviño; José Manuel Vilariño Orgeira, responsable de Banca Institucional ABANCA na Coruña; Verónica Rego López, responsable de Relacións Institucionais de Afundación; Rosana García López, concelleira de Cultura; e José Javier Niebla Álvarez, director da Oficina de ABANCA en Valdoviño.

As imaxes están dispoñibles na seguinte ligazón:

https://drive.google.com/drive/folders/1DUq-ioqWLYSJVZ3QTVnLiUmu3hqayKhi?usp=sharing

Esta proposta é parte do proxecto «Corrente cultural», que considera a arte como un instrumento imprescindible para fomentar o coñecemento e o desenvolvemento colectivo. Grazas a este proxecto, Afundación, a Obra Social de ABANCA, impulsa a capilaridade da cultura en Galicia, ampliando a oferta artística alén das súas sedes e trasladándoa ás vilas galegas para desenvolver tamén nelas as actividades da entidade. «Auga. O sangue da terra» é así mesmo unha invitación a reflexionar sobre o impacto da nosa actividade, así como sobre a necesidade perentoria de incorporar a sustentabilidade á nosa forma de vida.

Na exposición realízase un percorrido pola relación do ser humano coa auga mediante fotografías dos cinco continentes. Lugares tan remotos como Nova Celandia, India, China, Níxer, o deserto de Atacama ou a conca do lucense río Lor foron fotografados por Manuel Valcárcel e recollidos neste proxecto expositivo que ten como obxectivo valorar a auga como elemento vital e amosar como inflúe a presenza ou ausencia de auga nas culturas, nas paisaxes e nos ecosistemas.

As imaxes están distribuídas en tres bloques. O primeiro, «Os estados da auga», recolle fotografías tomadas en Nova Celandia e Galicia, co río Lor como protagonista, que plasman o paso da auga en estado sólido ao líquido e, ao mesmo tempo, os engarces entre a montaña e o mar.

«A auga e a vida» conforma o segundo bloque con imaxes de dous lugares do continente asiático. Un deles é Varanasi, na India, por onde pasa o río Ganges, que é parte da vida espiritual dos hindús e é destino sacro de peregrinación. O segundo lugar é Longshen Guilin, na China, onde o manexo da auga por parte do ser humano determinou a paisaxe. As ladeiras reconstruíronse con terrazas nas que se cultiva o arroz.

«Vivindo na escaseza» é o último bloque que trata sobre a escaseza e ausencia de auga. Inclúe imaxes de Malí e os seus pescadores bozo, quen, aproveitando a época seca, recollen todo o peixe que poden no río Níxer para despois vendelo. A escaseza de auga tamén se ilustra con imaxes do deserto de Atacama, onde a seca deu lugar a unha paisaxe lunar.

Toda a información da actividade de Afundación, na nosa SALA DE PRENSA.