A súa nenez transcorre en ámbalas marxes da baía viguesa, xa que seu pai traslada a pequena industria familiar de Cangas a Vigo, cando o futuro artista ten cinco anos. Pouco despois, reveses da fortuna levan a súa nai, xa viúva, a trasladarse a Francia. Ángel comeza a estudiar agronomía e ó fin decídese polas Belas Artes, que inicia en Burdeos e continúa en Madrid, onde o sorprende a guerra civil. Milita no bando republicano, e esta circunstancia condicionará a súa vida de exiliado, primeiro na República Dominicana, despois en Haití e finalmente en Porto Rico, con estancias en Nova York e México. Sucédense as súas exposicións no Caribe, Norteamérica e mais Europa. Consolida a súa fama de pintor e escultor, mentres en España, e en concreto na súa Galicia natal, é practicamente descoñecido. Afeccionado ó mar, é navegante sempiterno coa súa familia. O derradeiro ano da súa vida, sabedor de que o cáncer está minándoo, traballa febrilmente e falece en 1986, o 11 de novembro. As exposicións póstumas confirman a súa categoría de artista. A Galicia chega a súa obra da man da antiga Caixa de Vigo, traída pola súa familia en 1995. Botello iniciouse no impresionismo. A vida americana vai influír nel, imprégnase de indixenismo, aínda que sempre con un gran sentido espiritualista, que lle permite fundi-lo autóctono co seu lirismo persoal. Acusa a miúdo a influencia de Paul Gauguin.